有人寫字

作者：鍾樹森牧師

開學第二周某下午，兒子所讀小學的老師（是我中學的師妹）突然傳來短訊給我：「嘩，大件事！集會全校廣播，讚緊你個仔！」

「讚佢咩？」如此難得，我連忙查詢。

「我聽唔到，我只聽佢個名。」她答得叫我好生失望。

「？？」

「好人好事，你今晚問佢。」

既然話匣子打開了，我倆就東拉西扯談一番兒女近況，幾分鐘後她告訴我：

「原來好事係有個小一女仔唔想返學，你仔由門口送到佢返課室。」

想不到一件兒子的校園小事竟然會被老師公開在集會堂稱讚，實在覺得校方對正面行為的鼓勵是十分正確，亦感老師們對兒子寵愛有加。到了晚飯時間，我就問兒子：

「聽講你喺學校做咗件好事喎！講嚟聽吓！」

「吓！？無咩啫！」兒子錯愕地回覆我。

「你明知有人講左畀我聽，唔爭在宜家講嚟聽吓啦！」

「Okok，其實係噚日返學時，我入到停車場個轉彎位就見到有個小一女仔喺度喊。當時有老師同佢傾緊，但個女仔又好似唔理佢咁，於是我就走過去鼓勵佢，同埋話如果佢肯上去課室我就畀兩粒珍寶珠佢食，咁個女仔就上咗課室喇！」兒子將事情娓娓道來。

「哦！珍寶珠威力真係大！仲要兩粒添！」我半笑著臉道。

「咩呀！係因為媽咪叫我做愛心小老師時預備啲珍寶珠請人食嘛！」兒子老大不高興地回答我。

兒子今年讀小五，暑假前報名參加作愛心小老師，協助小一同學適應小學校園生活。太太為了協助他好好完成任務，於是提醒他準備一些糖果鼓勵學弟妹，誰不知就鼓勵了這位小一女同學。事後太太告訴我，她也收到自己中學同學的短訊：「（女兒）說集會堂老師讃賞你的兒子，你回家問吓佢，他的品格比很多成績好的同學好好多！」

一周之後某晚飯時，兒子突然跟我講：「爸爸，今日我又搞掂咗個小朋友！」

「搞掂？你對個小朋友做咗咩？」我好奇地問他。

「今朝我又見到另一個唔想返學嘅小一學生，我又用珍寶珠氹咗佢上課室喇！」兒子滿有成功感地說。

我覺得，老師的語言正向鼓勵（Verbally Positive Reinforcement）十分收效，兒子實踐好行為的想法絕對內植他的心裡，不過還看我家有多少珍寶珠了。

（章題圖片來源）

—

鍾樹森牧師
人到中年，當過中學教師、神學院教師，現最常被人叫作牧師，心裡仍最愛當老師，所以最愛梁啟超那句：「獻身願作萬矢的，著述求為百世師」。回到家裡，甚麼師也不比一聲「爸爸」，不過爸爸不易當，有激氣時、有開心時、有疲累時，但爸爸又應該會比牧師、老師當得最入心入肺呢！