有人寫字

作者：鍾樹森

學校運動會結束後的晚上，我陪兒子睡覺，雖云陪他睡覺，其實主要為了睡前傾偈而已，傾談中段他道：「爸爸，我想做肌肉佬呀！」

「肌肉佬？你講嘅肌肉佬係咩人呀？你知唔知你講咩先？」我對這突如其來的說話大感好奇。

「咪成身都係肌肉嗰啲大隻佬囉！」

「你幾時見過成身都係肌肉嘅肌肉佬呀？」

「佢哋手臂同心口都好大隻，好有型！個個禮拜返教會時係路邊都見到佢哋嫁！」兒子正色地答我，看來他是有一定的認識，因教會旁的健身中心常常有教練在派單張宣傳。

「咁你知唔知佢哋係度做乜？」

「佢哋好似我哋派單張，我估佢哋應該好好心地，諗住幫我哋變成好似佢哋咁多肌肉囉！」

「哈！你真係食米唔知價，佢哋派單張係為左搵錢，要練到好似佢哋咁大隻係要畀好多錢佢哋，兼且要練習先得嫁，你有無諗住畀錢？」

「吓？要畀錢？我邊有錢畀佢哋呀！」兒子大失所望地說。

被失望情緒包圍的兒子沒趣地收口，過了一會兒，他又道：「我覺得肌肉佬會娶個好老婆。」我真不明白他為何會有此想法，但他既然想得這麼認真，那就不可能置若罔聞，更要想想怎樣回答才好。

「咁你覺得媽咪係唔係好老婆？」我問他。

「媽咪梗係好老婆啦！」兒子揚聲答道。

「咁我又係唔係肌肉佬？」我惟有來個倒果為因反問。

「你？⋯⋯你手臂都有貓仔嘅。」

「咩貓仔？」我問。

「手臂呢度呢！咪貓仔囉！」兒子邊指著我上臂的二頭肌。

「呢度啲肌肉叫『老鼠仔』呀！」

「係喎！我講錯，係老鼠仔。」

「咁你真係覺得我係肌肉佬而娶媽咪呢個好老婆？」

「咁媽咪係好老婆嘛！」

「嗱！事實上，如果一個女仔只睇個男仔外表有無肌肉而決定嫁唔嫁佢，你覺得佢就係咪好老婆呢？」我反問兒子。

「咁又唔一定，佢可能係好，又可能唔好⋯⋯」兒子有點沒趣而柔聲地道。

數日後，我靈機一觸問兒子道：「其實你想做肌肉佬係咪因為你運動會擲球攞唔到獎牌呀？」其實我應該在運動會當晚就想到。

「都有啲係咁嘅。」兒子好像被人找到痛腳般答我。

「唔緊要喎！攞唔攞獎唔緊要，最緊要你有盡力比賽嘛！每次比賽都咁多人參加，你入選我就當你贏左啦！你依家先小四，大把機會繼續比賽，就算一路唔贏都無問題，最緊要參與嘛！」

「我嗰日當然好努力咁比賽啦！我擲左三次，次次都好出力，不過就越來越無力，所以第一擲就最遠囉！」

當世界不斷高舉成就、高分、奪金、數字等等的時候，其實就是一種「一將功成萬骨枯」的情況。人人都要第一，那第二以下的誰當？人人都是獨當一面的領袖，那誰來做跟隨與支援？自己作父親沒有甚麼法門，但強調「不計算成績，只計算付出」是我一直對兒子的要求，希望他明白兼接受吧！

（章題圖片來源：Shmector.com  https://goo.gl/n1GCf5）

—

鍾樹森牧師
人到中年，當過中學教師、神學院教師，現最常被人叫作牧師，心裡仍最愛當老師，所以最愛梁啟超那句：「獻身願作萬矢的，著述求為百世師」。回到家裡，甚麼師也不比一聲「爸爸」，不過爸爸不易當，有激氣時、有開心時、有疲累時，但爸爸又應該會比牧師、老師當得最入心入肺呢！