作者：鍾樹森

超人-30

暑假的一個晚上，兒子興高采烈地跟我說：「爸爸，我係永遠唔會忘記超人迪加（Ultraman Tiga）嫁！我大個仔之後，會係香港起個島畀GUTS*做基地，基地裡面有兩張床，一張畀我，另一張畀我最好嘅朋友。我要整一個可以變成超人迪加嘅變身器畀自己，同埋整一個可以成為超人佳亞（Ultraman Gaia）嘅變身器畀我最好嘅朋友。」

我一邊聽他說，一邊驚訝兒子如此投入，不單對超人有強烈感情，還要顧及暑假期間介紹他看超人電視劇的好朋友。在我聽得如痴如醉的時候，他繼續道：「嗱！其實我係大悟，所以我係超人迪加嘅變身人員（人間體），我好朋友就係我夢，所以佢係超人佳亞嘅變身人員。講多次！我係永遠唔會忘記超人嘅！」

可能大家都奇怪為何他首尾呼應地肯定不忘超人，事緣學期終結後打發日子不容易，兒子就在那時開始常常往同班同學的家裡遊玩。由於他們二人都是獨子，雙方母親又緊密合作，所以兩個好朋友一起渡過了不少日子，有時更留在對方家裡過夜呢！男孩子走在一起，總離不開打機、射槍、看動漫、看特攝，他倆看得最多的就是香港人口中的「鹹蛋超人」（Ultraman）。

兒子由起初勉強掌握超人迪加、超人佳亞、超人帝拿（Ultraman Dyna）等名字，到後來對不同角色與情節朗朗上口，我自己卻完全追不上。後來在兒子央求下，我買了一隻《超人八兄弟》影碟回家觀看，這一套電影描述人們已忘記了伴隨大家成長的超人，到最後人們的記憶才被喚醒。兒子看完這套超人電影之後，就不停說自己不會忘記超人。

說回那天晚上，我聽到兒子發表了他的「毋忘超人」宣言之後，我問道：

「你兩個都係超人，咁我呢？」

「咁你不如做帝拿啦！」兒子想也沒想就答我。

「好！咁我地三個一齊就係『平成三部作』喎！」我雖沒時間看，但也有空看過一些資料。

「咩平成咩三部呀？」

「唔緊要，總之我做帝拿之後就同埋你地一齊啦！」

「哈哈！好呀！你知唔知超人帝拿係三個之中最『渣』呢？！」對話就在兒子這段得勝宣言裡結束了。

*編按：GUTS為劇中地球防衞隊的名稱。

—

鍾樹森牧師
人到中年，當過中學教師、神學院教師，現最常被人叫作牧師，心裡仍最愛當老師，所以最愛梁啟超那句：「獻身願作萬矢的，著述求為百世師」。回到家裡，甚麼師也不比一聲「爸爸」，不過爸爸不易當，有激氣時、有開心時、有疲累時，但爸爸又應該會比牧師、老師當得最入心入肺呢！