作者:鍾樹森牧師

感謝天父.png

某星期天晚上睡前禱告,兒子開始領禱:「感謝天父畀我有咁開心嘅一天⋯⋯

我聽到他以這句開始,忽然之間覺得難以忍耐道:「喂!你祈禱有無得再(康字上去聲)啲呀?有邊一晚你祈禱唔係攞呢句做開始嘅呢?」

「咁我真係覺得咁嘛!」

「我知你係覺得咁,但你係咪要每一次都係咁開始,跟住又唔係有咩事情要係祈禱時同天父講喎!我真係戥天父覺得聽到悶囉!你有無咩實際啲嘅嘢要同天父講呢?」

「有嫁!」

「有嫁!有你又唔講?」

OK,OK,我講。」兒子每逢講「OK,OK」就代表無謂再跟我糾纏下去的意思。

「咁依家你自己再黎過喇!」我道。

「感謝天父畀我有咁開心嘅一天⋯⋯

「喂!你又係咁?」我打斷他道。

「咁我自己由頭黎過喎!梗係要咁開始過啦!」兒子不滿又感無辜地說。

「係嘅係嘅,係我心急,唔好意思,你再黎過。」這次是我跟他道歉了。

「感謝天父畀我有咁開心嘅一天,朝早可以返教會敬拜神;同咁多小朋友一齊玩、一齊整嘢食;跟住又同爸爸媽媽一齊;晚又去爺爺嫲嫲度食飯,食到好多好好味嘅嘢,又同咁多兄弟姊妹一齊玩。感謝天父畀我有咁開心嘅一天,奉主名求,阿們。」

「阿們。你主打都係講緊食同埋玩喎,黎緊有中文默書,點解你祈禱無講呀?」我問他。

「咁我就係記得頭先嗰啲之嘛!」兒子回答道。

OK,OK(這次到我講了),我祈禱喇。天父,求祢幫助睿睿,叫佢係黎緊呢個禮拜嘅中文默書能夠有心機準備、唔怕辛苦咁準備,叫佢臨場時能夠好好發揮,到時有應得嘅成績。祈禱奉主名求,阿們。」

在牧師家庭或基督徒家庭的子女,總會在某種基督化的家庭模式下生活。雖然各家在這方面的實際不同,大家的表現亦不一樣,但總會做一些如謝飯禱告、睡前禱告、看聖經(漫畫版或文字版)、詩歌敬拜等等的事情。我難以告訴人這些「基督化」的活動就一定會叫子女長大後真實跟隨神,甚至有時會擔心處理不好更會適得其反,但自己仍在不叫兒子反感的情況下努力堅持著。

其實兒子肯每晚睡前禱告,禱告時又可以回溯一天的事(當然是他覺得要緊的),為這些事而感謝上帝的話,不論認真或馬虎都已經十分好了。有時自己對他的言行反應太快、太大、太急,這都會叫他不易回應。還望自己未來不要這麼心急,多點為他締造有足夠空間成長的家!

鍾樹森牧師
人到中年,當過中學教師、神學院教師,現最常被人叫作牧師,心裡仍最愛當老師,所以最愛梁啟超那句:「獻身願作萬矢的,著述求為百世師」。回到家裡,甚麼師也不比一聲「爸爸」,不過爸爸不易當,有激氣時、有開心時、有疲累時,但爸爸又應該會比牧師、老師當得最入心入肺呢!

 

Advertisements