有人寫字

作者：鍾樹森牧師

有一天晚飯時，兒子突然說：「爸爸，你知唔知依家我個花名係咩？」

「乜你唔係一路叫大笨鐘咩？」我反問他。

「呢個係以前嘅，依家佢哋（同學）又幫我改咗我新名喇！」兒子喜悅地回應我。

「咁依家又改咗做咩？」

「依家我叫珍珍薯片囉！」

「哦！因為你個名有個『禛』，所以就食字叫做『珍珍薯片』，咁你鍾唔鍾意呢個名呢？」

「花名」對很多人的成長來說，是反映了當事人的一些特質。大約一個多月前，兒子已告訴我他被同學取名「大笨鐘」這渾號，我立即跟他查詢原因。那時他道：「因為我笨笨哋，成日唔記得嘢囉！「哇！咁你會唔會唔開心？」我心裡緊張口裡平淡地問。「 唔會喎！Ok啦！有個花名都幾得意嘅。」兒子這樂天的性格很是寶貴。

鏡頭回到當天晚飯，我問兒子是否喜歡新名之後，他答道：「我有個同學個花名叫『撈豉油』㖭呀！」

「你問你鍾唔鍾意依家呢個名喎！」我追問答非所問的他。

「咁我鍾意依家呢個多啲，之前嗰個我都有啲唔係咁開心。」兒子認真地答我。

「咁依家呢個係咪你聽得開心啲？」我問道。

「人哋叫我呢個我會鍾意啲，佢哋一講：『去旅行？』大家就會話：『梗係食珍珍薯片啦！』（這好像是當年的廣告台詞）其實我仲有同學嘅花名叫『卡樂B』啦、『豬扒意粉』啦！」兒子愉快地繼續分享。

「乜你哋啲花名咁得意嘅？全部都係飲飲食食嚟嫁喎！你知唔知媽咪個花名又叫咩？」我笑著問他

「唓！正常人聽到媽咪個名都只會改埋同一個名啦！咪係『周圍迄』！咁爸爸你個花名係咩？」又到兒子反回問我了。

「我都有唔止一個嘅，話得畀你知嘅係有人叫我『鍾森』（中心、忠心？）囉！」我都覺得要留一兩手比較安全。

「咁係咪你啲同學覺得你對佢哋好『忠心』咁呢？」

「咁你自己估吓囉！」

「唔知喎！我都費事估。」兒子發言就以此作結。

—

鍾樹森牧師
人到中年，當過中學教師、神學院教師，現最常被人叫作牧師，心裡仍最愛當老師，所以最愛梁啟超那句：「獻身願作萬矢的，著述求為百世師」。回到家裡，甚麼師也不比一聲「爸爸」，不過爸爸不易當，有激氣時、有開心時、有疲累時，但爸爸又應該會比牧師、老師當得最入心入肺呢！