作者：鍾樹森牧師

dictation

自己早已曉得兒子在學業這方面比我與太太差一大截（比我還容易，比我那位取女生品學優良獎的太太真的差天與地），所以我亦一直對他在這方面沒有太大要求，總之能夠過關升班就可以。從前小一、二的日子，由於所學的始終不太艱深，所以就算他如何隨便，也還是可以安然升班的。今年終於小三了，發現日常功課的份量真的比從前多，默書的頻率與難度比從前高。

兒子在本學年的第一個考驗就是中文默書，在準備的時候看見他對認字、默寫與拼音都叫苦連天，那刻已心知不妙。到了上週，中文默書成績派回來了，晚上我回到家就自然問他道：「你中文默書幾多分？」

「三十八分……」兒子輕聲兼低頭地說。

「唉！唔合格喎！你溫習時唔肯畀心機，就會係咁嘅結果啦！咁你自己依家覺得點先？」我一本正經地跟他說。

「唔開心囉！我知道中文默書唔合格時，我自己都喊咗出嚟呀！」他這刻說著說著，自己也哭了起來。

「喊唔喊都改變唔到事實啦！咁如果你想下次唔使唔開心的話，你就要早啲好好溫習啦！」我這樣說，是因為數天後又有英文默書。

「其實唔止我喊，我前面嗰個同學都有喊。」兒子忽道。

「係呀？佢又唔合格咩？」我自然如此問他。

「唔係喎！佢九十幾分，佢係為攞唔到一百分而喊囉！」兒子的答案實叫人失笑。

「咁佢喊嘅嘢同你唔同喎！佢係要求太高啫，不過你都唔可以咁無要求喎！」

「我其實都唔係好差，有人得十八分㖭咋！」

「咁你係咪想同人哋十八分比呢？你應該同自己以往比呀嘛！我不嬲點同你講呀？我話成功失敗都唔係最重要，最重要係你要努力唔放棄嘛！」我都有點氣憤。

「OKOKOK，我會喇！」個仔要終止對話時就會給這回應。

大約一週之後，某天黃昏兒子致電給我，第一句就問我：「爸爸，你估吓我英文默書幾多分？」

「你問得我幾多分就一定唔會低分啦！」我笑著答他。

「咁你估我有幾多分先？」兒子也笑著追問我。

「我估你八十分啦！」

「錯！」

「你無？」

「唔係，係無咁低！」

「咁就九十分啦！」

「你都錯，仲差三分！」

「噢！恭喜你喎！有九十三分！咁我聽晚整啲好嘢畀你食啦！」我是認真恭喜他有如此分數的。

「唓！咁遲，媽咪今晚就請我食雪榚喇！」兒子高傲又有點不滿地回覆我。

「OKOK，咁你聽晚食唔食好嘢先？」

「梗係食啦！」兒子高興地答我。

學業成績對學生的自我有很大影響，成績高低對他的自尊感有著極大相關，對於兒子在英文默書能收回失地，這對他來說是十分重要的。事情又常常是循環地走，有的還會加上去。話說收到英文默書九十三分那一晚，兒子更自發拿出英文copy book來寫字呢！

—

鍾樹森牧師
人到中年，當過中學教師、神學院教師，現最常被人叫作牧師，心裡仍最愛當老師，所以最愛梁啟超那句：「獻身願作萬矢的，著述求為百世師」。回到家裡，甚麼師也不比一聲「爸爸」，不過爸爸不易當，有激氣時、有開心時、有疲累時，但爸爸又應該會比牧師、老師當得最入心入肺呢！