有人寫字

作者：鍾樹森牧師

周日早上六時許（證明前一晚睡得好、睡得早），兒子已走來我房間嚷著：「講過唔算數！你呢次仲唔俾我捉到？」，半夢半醒的我其實還未知發生甚麼事情，唯有問他：

「你講咩？我唔知你想點喎？」

「我話你好講過唔算數呀！」看來我要他再講一次已有點叫他火光。

「我幾時講過咩事先？我從未試過講過唔算數，你知嫁喎！」

「就係因為你從未試過，所以依家我就要話比你知，你終於俾我發現你講過唔算數囉！」

事緣幾年前有機會聽過Big Boyz Club（這是一青年成長活動而非電視節目）的《男孩宣言》，我們一家三口都十分喜愛。他們的作品有許多都是與男孩子成長有關，其中《男孩之歌》裡的歌詞「我想明日大個忍得到痛楚，我總不會食言，願意面對挑戰」更是我們常常跟兒子哼著的。就是因為這句歌詞，我常強調做父親的我不會食言，不論是我答應兒子一些事情時會講：「我唔會甩底，唔會講過唔算數既，係咪？『我總不會食言，願意面對挑戰』嘛！」類近的說話在鼓勵他要努力的時候會講、在責備他的時候更會講。

日積月累之下，可能我在他面前講過上述說話上千次的了，加上我可以在他面前講的事情都真是言出必行，我自覺有時候他都十分相信我不會「甩底」的。尤其是在我答應給他好處，而最後他又得到的時候，強化作用（reinforcement）的效果更為明顯，連我自己有時心裡也有點沾沾自喜。如今忽然被他指責「講過唔算數」的時候，心裡也有點莫名其妙，於是我向他詢問：

「查實你無端端做乜話我講過唔算數呢？」

「嘿！你咪唔記得囉！仲唔係講過唔算數？」仔的回應真得勢不饒人。

「係既！係既！我係唔啱，我錯，不過我都求下你話比我知我咩事好唔好？」形勢不妙，我當然低聲下氣。

「嗰晚（周五）我話要玩大富翁牌，你話副牌幼稚，仲有係已經好夜，所以你話唔同我玩。跟住你仲話星期六會同我玩，仲會玩副原裝大副既大富翁，咁你噚晚就係無同我玩囉！咁咪講過唔算數啦！」

「係喎！係我唔記得左，係我錯！咁今晚玩返啦！好唔好？」有錯要認都算係我認為我人生一個重要的良好品格。

「好！你今晚要同我玩喎！」兒仔算是不多計較的人。

到了晚上，我發現大富翁圖版遊戲原來放在辦公室裡，那自然無法跟兒子玩了，我唯有拿出曾被我嘲笑為幼稚（其實一點也不幼稚的，只是當時我不想玩而找藉口而已）的大富翁咭牌出來。幸好兒子重視有人跟他玩多於玩甚麼，這一晚讓我還可以拿玩牌來將功補過，實感激不盡呢！

—

鍾樹森牧師
人到中年，當過中學教師、神學院教師，現最常被人叫作牧師，心裡仍最愛當老師，所以最愛梁啟超那句：「獻身願作萬矢的，著述求為百世師」。回到家裡，甚麼師也不比一聲「爸爸」，不過爸爸不易當，有激氣時、有開心時、有疲累時，但爸爸又應該會比牧師、老師當得最入心入肺呢！