有人寫字

作者：鍾樹森牧師

盛夏某晚上父子倆往運動場跑步，三十分鐘運動之後就一起回家，途中兒子突然眉頭深鎖兼高聲地對我說：「爸爸，你好臭呀！」

「我當然臭啦！你咪係一樣臭！」

「我無臭，係你先至臭！」他看來要劃清界線。

「你聞到我臭有乜出奇？自然不過啦！之但係你其實一樣係成身臭汗呢！」

「唔係喎！我聞唔到自已臭，但係你一行埋黎我就聞到你臭喇！」基本上大家都係重覆番自已講過的。

「你同我一齊跑步，大家一齊出到成身汗，出汗多就自然臭，如果呢一刻媽咪走過黎，你估佢會話邊個臭先？」我反問兒子。

「媽咪梗係話我地兩個都好臭啦！」其實兒子都十分客觀的。

「咪係囉！人好得意既，自己臭就聞唔到，人地臭就聞得到。」

「為甚麼你看見弟兄眼中有刺，卻不想自己眼中有樑木呢？」兒子忽然背起聖經來，真個峰迴路轉。

「你背聖經喎！你知唔知點解呀？呢段聖經又關我地個身臭咩事？」難得出現偶發性學習（Incidental Learning），號稱稍懂教育的我豈能放過機會呢！

「梗係關我地臭事啦！明明自己係臭，但係自己就唔覺自己臭，反而自己就覺人地臭囉！」兒子的答案叫我繼續堅持相信小朋友係明白事理的。

「無錯！咁我地就唔好成日話人地尐唔好野啦！可能我地自己都係一樣啫！」我也快快來個總結發言。

回到家後，第一時間就趕兒子入浴室洗澡，他脫下衣服的時候大聲道：「哇！好臭呀！」

「咩野臭？」我問。

「我件衫好臭囉！」

「咪係囉！頭先你聞唔到臭，依家一除衫就聞得好清楚。」

「係呀！原來件衫著住就唔覺臭，一唔著住就聞到好臭，咁唔除件衫就唔洗聞到佢到臭啦！」兒子祭出駝鳥政策來呢！

「點得呀！咁你自己就唔臭，但你身邊個個都聞到你臭喇！」

「OK！OK！咁我衣家除衫，不過其實有樣野仲臭既呢！」

「有乜野仲臭尐？」

在我還未問完的同時，兒子已經脫掉短褲往我的鼻塞過來道：「最臭咪係條褲呀！佢將所有汗都吸哂係度呢！」電光火石之間，小弟也閃避不來，結果咀唇親吻了兒子的短褲，唯有父子齊齊洗澡除臭了！

—

鍾樹森牧師
人到中年，當過中學教師、神學院教師，現最常被人叫作牧師，心裡仍最愛當老師，所以最愛梁啟超那句：「獻身願作萬矢的，著述求為百世師」。回到家裡，甚麼師也不比一聲「爸爸」，不過爸爸不易當，有激氣時、有開心時、有疲累時，但爸爸又應該會比牧師、老師當得最入心入肺呢！