有人寫字

作者：鍾樹森牧師

早前兒子考試，在某個考試日的夜晚，睡覺之前兒子跟太太說：「XXX同我講：『我愛你』！」

「佢同你講咩話？」不得了，緊張的太太即時追問。

「佢話佢愛我囉！」兒子鎮定地回覆。

「佢幾時同你講嫁？好地地佢做乜要講呢尐野？」

「今日考緊試時講囉！」

「你地考緊試喎！點解係度傾偈？」不處理講甚麼，先處理考試期間進行溝通的紀律問題。

「我地無傾偈呀！今日考試，我答完野之後趴係枱面，我地用手勢唔係傾偈，佢就用手勢做比我睇囉！」

「做手勢？佢點做？」

「咁做囉。」兒子一邊講一邊示範當時女同學的手勢（見下圖）。

「咁你見到之後，你點呀？」太太緊張地追問。

「咁我咪話返比佢知我點囉！」兒子回答的方法真叫人吊胃口。

「你點話？話尐乜？」太太又要追問。

「我初初即刻比個（見下圖）佢，但佢跟住繼續話愛我，咁我都做番個『我愛你』既手勢比佢囉！」兒子有時真的很老實。

「你知唔知你咁做係咩意思呀？」

「我梗係知啦！我地都話愛人地的話，咁就會拍拖，拍拖之後仲會結婚添！其實你同爸爸幾時拍拖呢？你地係咪有呢個呢個（見下圖）（他用雙手扮作接吻）？」兒子其實有一定認識的，還懂得轉移焦點。

「我同爸爸係大學時先至拍拖，我地要拍左七年拖先至結婚，你今年七歲，即係話要由你係BB仔咁一直等到依家咁大先結婚。」

「七年？好耐啫，都係唔好囉！」一個缺乏耐性的人在這談話裡仍一如既往般表現。

次日晚飯只有我與兒子兩人，我追問此事：「聽講呀XXX話愛你喎！」

「係呀！我都係咁同佢講。」兒子都很理直氣壯的。

「你同個女同學咁講，人地爸爸媽媽知唔知呢件事嫁？」

「梗係知啦！」兒子高聲的回應我。

「你點知人地知？」這刻我自己也相當好奇。

「今朝返學我見媽咪同佢媽咪走埋一邊傾偈，一定係講呢件事啦！你咪當唔知喎！」原來兒子按他的觀察得此結論。

當晚睡前，我向太太報告此事，她立即答道：「邊度係呀！我地提都無提過呢件事，我地講緊考試溫習尐辛苦野啫！」

這又是「諗多左」的例子，看來我們在生活裡都有很多這種機會呢！至於彼此表白的一對年輕男女，我看暫時也不用理會的，反正大家一到暑假又各忙各的，哪會有後續發展呢！

*謹此多謝兒子批准刊於【禛森話】裡，更答應事後再示範當日手勢供我拍攝。

—

鍾樹森牧師
人到中年，當過中學教師、神學院教師，現最常被人叫作牧師，心裡仍最愛當老師，所以最愛梁啟超那句：「獻身願作萬矢的，著述求為百世師」。回到家裡，甚麼師也不比一聲「爸爸」，不過爸爸不易當，有激氣時、有開心時、有疲累時，但爸爸又應該會比牧師、老師當得最入心入肺呢！