作者：鍾樹森牧師
某天開車回家，途經海底隧道，講東講西之餘提到了隧道內外也有「影快相」的雷達偵速器。
兒子突然說：「爸爸，如果我係政府就好囉！」
「點解？」我立即問他，他這次不再問特首大定法律大[1]，乾脆想成為政府？
「因為我如果係政府的話，我就會將所有呢尐相機拆哂佢，咁你就唔會比人罰錢喇！」
「但你一個人係唔會變成一個政府喎！政府裡面有好多人同好多部份負責唔同野喎！」他長年要面對專門「捉字虱」的父親也不容易。
「咁我就做拆相機嗰個部門啦！」厲害，若有想得出這個部門的人，他的創意應該媲美想出控制食物鹽和糖委員會的那人。
「咁又無呢個部門，但呢尐野係負責交通既部門做緊。」
「咁我就做交通嗰個部門啦！爸爸，你記唔記得上次係斜路呀？」兒子有決定後就立即又有問題。
「咩斜路？開車就一定會行過斜路啦！」
「嗰次呢！」
「邊次呀？」
「嗰次我地行過斜路，有好多警察截住你呀！仲要你吹波仔呢！」兒子這句話可叫不知事情底蘊者嚇得一驚。
「哦！嗰次，係呀！我嗰次落西貢時超速，結果要罰錢囉！」我終於知道他在講大半年前的一次超速經歷。
「係呀！當時仲有好多部車都同你一齊排住隊比警察抄牌呢！如果係馬路上再無相機影你地相的話就唔會有抄牌囉！」原來他一直沒有離開主題的，他仍然環繞「影快相」一事。
一直以來，自己對於兒子的記憶都不太掌握，究竟那些事情轉瞬即忘，那些事情又深印腦海，那些事情要有提示才能記著，似乎都不大清楚。前面所述開車住西貢超速一事，對我來說只是一件生活小事，但想不到他仍然記得。相信不少父母包括自己也接著想說「如果讀書考試有咁好記性就好囉！」，但事情總不如大家所想，記憶就總有其隨意性。
其實易地而處，自己至今仍會記得一些童年往事，有愉快的、有不快的、有完整的、也有支離破碎的。雖然自己難以解釋為何四十多歲的人仍記得幾歲時發生的某件事，但反而這些沒有忘記的事卻會影響著自己。例如早前自己跟弟妹談到父親的一些情況，心裡越說越不快，究其原因只是我那刻記起大約五歲時爸媽二人爭執的片段而已。
這刻自己在想，兒子長大之後又會記得甚麼呢？有起憶的事又會怎樣影響他呢？我無從控制，他也管不來，但如果全都是不快或叫他討厭的事情，真的千萬個不想呢！唯有提醒自已，日常真的要管好自已的言行吧！
—
—
鍾樹森牧師
人到中年，當過中學教師、神學院教師，現最常被人叫作牧師，心裡仍最愛當老師，所以最愛梁啟超那句：「獻身願作萬矢的，著述求為百世師」。回到家裡，甚麼師也不比一聲「爸爸」，不過爸爸不易當，有激氣時、有開心時、有疲累時，但爸爸又應該會比牧師、老師當得最入心入肺呢！
有人寫字 
Leave a Reply