作者:陳到

在下一直觀察Facebook上基督徒論政,他們的表現,大到和港式中產差不多:怕亂、唔鍾意嘈、愛穩定、覺得香港依然不錯……而他們與港式中產有別之處是他們他們「創造」了一套「港式政教分離」的教義,這套教義是一套意識形態,傾向否定民主、認為禱告和傳福音比社會抗爭更有價

值、認為神會搞掂一切……

以下一篇由我收集網友聽過的「基督徒論政金句」編彙而成,可以當成一篇「基督徒論政潮文」。當中的邏輯或許會矛盾或自打嘴巴,但不要緊,這是為了真實感更故意安排的。

依家社會太多怨氣,香港愈來愈政治化,甚麼也要拉上政治,聖經係講愛,我哋係和平之子,唔應該製造恨仇,尐人係咁同官員改花名,真係好唔尊重。而且點解要掟野、要遊行?因為佢哋心裡面無平安!其實無論支唔支持、要唔要求、爭唔爭取民主都唔駛引用聖經呀!認為要支持咪支持囉、認為要爭取咪爭囉、認為唔支持咪唔好支持囉、認為唔應該爭取咪唔好去爭取囉!引用聖經其實就等如強姦或利用了聖經!咁做簡直可恥!

況且,聖經邊句有講話人人平等?耶穌有無反政府?保羅叫人順服的羅馬帝國好公義嗎?但以理所服侍的巴比倫王是一個怎樣的王?你點知依家政府唔合神嘅心意?社會咁多議題,唔知誰是誰非,換轉我地喺佢地個位都做唔到啦。聖經都無講民主,民主唔係絕對真理,亦未必係絕對公義,神嘅公義未必係民主,最緊要係返返聖經點睇。其實政治無分對錯,基督徒有呼召做孫中山ok,但唔好話唔跟你套野就是唔啱,況且各人有各人的恩賜,政治既嘢我唔識,但我相信神希望我們有包容的心,我哋要講關愛人的話,所以在教會不要講政治。唔好自我公義!要依靠神。

基督徒係傳天國嘅福音,唔係理地上嘅事,呢個社會近排好亂,我們好多時都唔知點做選擇好,但是,有一個選擇絕對正確,趁現在香港仍有自由,就盡最大努力向人傳福音,定必得救!民主不如上帝做主,遊行抗爭冇用架!我唔關心民主,反而最關心主民!我地一齊為呢個社會禱告好過啦!我地要合一,為掌權者禱告,順服地上掌權者唔應該求自己作主,應該求神賜智慧畀掌權者!點解你唔相信禱告嘅力量?禱告,一切交比神。主能夠!在人不能,在神凡事都行!哈利路亞!

AMEN請LIKE。

陳到,傳道,衛道者腳底的沙石。

Advertisements